Mosambiekse man aangekeer vir noodlottige skietery van ‘n veiligheidswag by Riverside Mall
NELSPRUIT – ‘n Mosambiekse verdagte (35) is in hegtenis geneem na ‘n tragiese voorval wat, Vrydag 18 April 2025 by Riverside Mall in Nelspruit plaasgevind het. Die verdagte het na bewering ‘n veiligheidswag noodlottig geskiet tydens die voorval wat omstreeks 22:40 plaasgevind het.
Voorlopige ondersoeke het vasgestel dat veiligheidsbeamptes drie verdagte mans waargeneem het wat naby die Riverside Mall ronddwaal. Toe een van die wagte die individue genader het vir ondervraging, het ‘n woordewisseling ontstaan, wat daartoe gelei het dat die wag deur een van die verdagtes in die kop geskiet is.
In reaksie op die geweervuur het bykomende veiligheidspersoneel by die toneel opgedaag, wat gelei het tot ‘n skietwisseling tussen die verdagte en veiligheidspersoneel. Die verdagte is daarna tydens die konfrontasie beseer en het op die dak van die Mall gaan wegkruip.
Danksy vinnige optrede deur die sekuriteitspan is die SAPD in kennis gestel, wat gelei het tot ‘n gekoördineerde reaksie waarby die Veiligheidswagte, die Flying Squad en Sigbare Polisiëringslede van Nelspruit Polisiestasie betrokke was.
Die verdagte is opgespoor en uitgesnuffel uit sy skuilplek op die Mall se dak in die vroeë oggendure van Saterdag 19 April 2025. Tydens sy arrestasie het die polisie beslag gelê op ‘n AK-47 geweer by sy besit, wat nou ballistiese toetse ondergaan om vas te stel of dit voorheen in die pleging van misdaad elders gebruik is.
Die polisie-ondersoekers werk saam met amptenare van die departement van binnelandse sake om die verdagte se regstatus in Suid-Afrika te verifieer. Ammunisie is ook op die toneel gevind en op al hierdie items is beslag gelê om deel te vorm van die polisie se ondersoek.
Die verdagte, wat tydens die voorval beserings opgedoen het, ontvang tans mediese behandeling onder polisiebewaking. Hy staan tereg op aanklagte van moord, poging tot moord en die besit van ‘n onwettige vuurwapen met ammunisie. Bykomende aanklagte sal waarskynlik teen die verdagte gelê word soos die ondersoek vorder.
Die ander twee verdagtes is steeds op vrye voet en die polisie doen ‘n beroep op enigiemand met inligting oor waar hulle is om die Stop Misdaad-nommer by 08600 10111 te skakel of inligting via MYSAPSAPP te stuur. Alle inligting wat ontvang word, sal as vertroulik hanteer word en bellers kan kies om anoniem te bly.
