Boer maak ‘n plan! – Gemeenskaps- en noodpersoneel red bestuurder van vloedwater
BEESTEKRAAL – Woensdagoggend het ‘n dramatiese redding in Beestekraal ontvou nadat ‘n voertuig deur stygende vloedwater meegesleur is. Die bestuurder van die voertuig het daarin geslaag om net betyds te ontsnap en aan ‘n boom te gryp, waar hy vir byna twee uur vasgeklou het, voordat ‘n verbygaande bestuurder hom gesien het.
Die H.E.M.S span saam met Station 21 Fire & Rescue het dadelik op die toneel aangekom nadat hulle die oproep ontvang het. Met hulle aankoms het plaaslike boere, wat die ontvouende situasie gesien het, egter reeds begin om ‘n reddingsplan te reël.
Een moedige boer het, nadat hy ‘n tou om sy middel vasgemaak is, in die snelbewegende waters ingegaan om die gestrande bestuurder te red. Danksy sy dapperheid en vinnige denke is die pasiënt veilig na die wal gebring.
Nadat hy gered is, is die bestuurder deur H.E.M.S paramedikuste behandel en vinnig na die hospitaal in Brits vervoer vir verdere sorg. Wonder bo wonder het die bestuurder ondanks die gevaarlike omstandighede geen ernstige beserings opgedoen nie.
Die reddingsoperasie was ‘n ware bewys van die gees van samewerking tussen plaaslike boere en nooddienste, wat ‘n suksesvolle uitkoms verseker het ten spyte van die uitdagende situasie.
