Ses gewapende mans vasgetrek by Brits Verkeersdepartement
BRITS – Inligting wat op Donderdag, 31 Oktober 2024 van Misdaadintelligensie in die Tshwane-distrik ontvang is, is deur Brits Misdaadintelligensie, Brits Trio Taakspan, Hartbeespoortdam Misdaadvoorkoming, Brits Operasionele Bevelsentrum (OCC) en PPS Sekuriteit geoperasionaliseer. Dit het gelei tot die opsporing van ‘n grys Mercedes Benz met ses insittendes, wat naby die Brits Verkeersdepartement voorgekeer is.
Die mans is saam met die voertuig deursoek en drie vuurwapens en ammunisie was gevind, wat in die voertuig versteek was. Twee van die vuurwapens se reeksnommers is verwyder. Die mans kon nie rekenskap gee van die vuurwapens nie en is dadelik in hegtenis geneem vir die besit van ongelisensieerde vuurwapens en ammunisie. Aanvanklike ondersoeke het die mans verbind met sewe ander sake, wat wissel van roof tot moord, wat tussen Junie en Oktober 2024 in Temba en Hammanskraal, Gauteng provinsie, aangemeld is. Daar is ook vasgestel dat een van die vuurwapens in Julie 2024 in Kameeldrift tydens ‘n huisroof gesteel is.
Al ses verdagtes, insluitend vier Zimbabwiese buitelandse burgers, tussen 20 en 35 jaar oud, sal op Maandag, 4 November 2024 voor die Brits-landdroshof verskyn.
Die provinsiale polisiekommissaris, luitenant-generaal Sello Kwena, het lede gelukgewens vir hul samewerking en harde werk wat tot die arrestasies gelei het. Hy het gesê die polisie sal voortgaan om hard te werk om te verseker dat onwettige en dodelike vuurwapens wat in die verkeerde hande is, uit die samelewing verwyder word.
